ધ રીચેસ્ટ મેન ઑફ બેબીલોન – ધન અને શિસ્ત વિશે એક પ્રેરણાદાયી માર્ગદર્શન

ધ રીચેસ્ટ મેન ઑફ બેબીલોન: ધન અને શિસ્ત વિશે એક પ્રેરણાદાયી માર્ગદર્શન

પુસ્તકો વાંચ્યા પછી ક્યારેક મને એના વિષે સાથે શેર કરવું ગમે છે. મેં બે મહિના પહેલાં The Richest Man in Babylon (બેબીલોનનો સૌથી ધનાઢ્ય માણસ) પુસ્તક વાંચ્યું જે ખૂબ જ પ્રેરણાદાયી લાગ્યું. આ પુસ્તક જ્યોર્જ સેમ્યુઅલ ક્લાસને દશકો પહેલા લખ્યું છે. પુસ્તકમાં ખોટું કર્યા વગર વધારે અર્થ ઉપાર્જન કેવી રીતે કરવું તે વિશે ખૂબ સરળ રીતે લખ્યું છે.

બેબીલોન શહેર મેસોપોટેમીયા (અત્યારે એ દેશનું નામ ઇરાક છે) દેશનું સમૃદ્ધ શહેર હતું. અત્યારે તો એ શહેર જયાં હતું ત્યાં માત્ર ખંડેર છે, ઈસ્વી. પૂર્વે ૬૨૬-૫૩૯ દરમ્યાનનો સમય ગાળો આ શહેરનો સ્વર્ણિમ સમય હતો.આ પુસ્તક માત્ર ધન કેવી રીતે કમાવું તે વિશે નથી, પરંતુ જીવનશૈલી, શિસ્ત, સંયમ અને ધીમે ધીમે આગળ વધવાની વિચારસરણી વિશે છે. બેબીલોનની પ્રાચીન સંસ્કૃતિના સંદર્ભ સાથે લેખકે ધનની સિદ્ધિ માટે સરળ પણ અસરકારક નિયમો રજૂ કર્યા છે.

આ પુસ્તકમાં પૈસા કમાવાની પાંચ મુખ્ય રીતો સમજાવવામાં આવી છે ૧. આવકમાંથી થોડું બચાવો, ૨. બચતને યોગ્ય જગ્યાએ રોકો, ૩. ખર્ચને નિયંત્રણમાં રાખો, ૪. ભવિષ્ય માટે આયોજન કરો અને ૫. જ્ઞાન દ્વારા પોતાના નાણાંકીય નિર્ણયો લેવામાં સુધારા કરો. મને ખાસ કરીને એ વાત ગમી કે પુસ્તકમાં જણાવેલા નિયમો બધાને લાગુ પડે એવા છે પછી તે સામાન્ય માણસ, નોકરિયાત કે મોટા વ્યવસાય કરનાર હોય .

લેખકે બેબીલોનના વેપારીઓ અને નાગરિકોના જીવનનાં પ્રેરક પ્રસંગો દ્વારા બતાવ્યું છે કે કેવી રીતે નાની બચતથી પણ મોટી સંપત્તિ બનાવી શકાય. સાથે જ એ પણ સમજાવ્યું છે કે લોભ કે અતિશય જોખમ લેવાથી કેવી રીતે નુકસાન થાય છે. પુસ્તકમાં કરેલી રજુઆત સરળ, સ્પષ્ટ અને જીવન સાથે જોડીને સમજી શકાય તેવી છે.

મને સૌથી મહત્વની બાબત એ લાગી કે આ પુસ્તક પૈસાને માત્ર ભૌતિક વસ્તુ તરીકે નહીં, પણ જવાબદારી અને બુદ્ધિ સાથે જોડીને જોવાનું શીખવે છે. આજે જ્યારે નાણાંકીય ખેંચ, ખર્ચ અને જીવનશૈલીને લગતી સમસ્યાઓ વધતી જાય છે ત્યારે આવા માર્ગદર્શક પુસ્તકો જીવનને સંતુલિત બનાવવામાં મદદરૂપ થાય છે.

હું એ બધા માટે આ પુસ્તક ભલામણ કરું છું જે પોતાની નાણાંકીય સ્થિતિ સુધારવા માગે છે, તેમજ શિસ્ત અને સમજ સાથે આગળ વધવા ઈચ્છે છે. જે રીતે લેખકે સરળ નિયમોથી મોટા પરિણામ મેળવવાની દિશા બતાવી છે તે દરેક માટે ઉપયોગી છે. આ પુસ્તકનો ગુજરાતી અને હિન્દીમાં પણ અનુવાદ થયો છે.